Stilfolioj de pagxauxtoroj kaj de pagxuzantoj

Normale stilfolion verkas tiu, kiu kreas TTT-pagxon, la auxtoro. Per sia stilfolio li decidas, aux pli gxuste proponas, kiel la pagxo estu prezentata en TTT-legiloj. Sed leganto povas mem fari stilfolion kun propraj prezentoreguloj, kiuj povas anstatauxi la regulojn de auxtoraj stilfolioj, aux miksigxi kun tiuj reguloj. Tiu ideo estas unu el la bazaj ideoj de stilfolioj, kaj gxuste tial la plej ofte uzata speco de stilfolioj nomigxas tiel, kiel gxi nomigxas: “Cascading Style-Sheets” = “Kaskadaj Stilfolioj”, CSS. La vorto “kaskadaj” tie indikas, ke stilreguloj venas de pluraj fontoj, kiuj kunmiksigxas kvazaux akvo de kaskado.

Gxeneralajn klarigojn pri stilfolioj vi povas trovi en mia kurso Kiel fari TTT-pagxojn - Kurso pri XHTML kaj CSS.

Aktivigi propran stilfolion

Kiel aktivigi propran stilfolion, dependas la la TTT-legilo, kiun oni uzas. Se oni uzas la legilon Fajrovulpo, oni povas tiajn regulojn skribi en dosiero, kiu nomigxas “userContent.css” (kiu trovigxu ene de la dosierujo “chrome” en la dosierujo, kie logxas la personaj agordoj de Fajrovulpo). En la Microsoft-a Interreta Esplorilo kaj en la legilo Opero oni povas mem decidi, kie la propra stilfolio trovigxu, kaj kiel gxi nomigxu. En iu el la multaj submenuoj de tiuj programoj oni povas tion indiki (sercxu!). Bedauxrinde ne cxiuj TTT-legiloj donas eblon uzi propran stilfolion.

Kiel uzi TTT-signaturon?

TTT-signaturo estas unika signaturo, kiu trovigxas en la “body”-elememento de TTT-pagxo. En miaj pagxoj estas la TTT-signaturo www-bertilow-com. Tio signifas, ke en la “body”-elemento de la pagxokodo estas skribite id="www-bertilow-com".

Nur miaj pagxoj enhavas gxuste tiun signaturon (aux almenaux la intenco estas, ke nur miaj pagxoj gxin enhavu), kaj tial pagxolegantoj povas skribi stilregulojn, kiuj uzigxas nur en miaj pagxoj. Ekzemple:

#www-bertilow-com * {
  color: #000 !important;
  background-color: #fff !important;
}

Tiu stilregulo, se oni metas gxin en propran stilfolion (kaj gxin bonorde aktivigas), kauxzas, ke miaj pagxoj prezentigxas kun nigra tekstokoloro sur blanka fono. La regulo superas la stilregulojn en miaj stilfolioj, forigante tiujn kolorojn, kiujn mi tie indikis. Do, se vi ne sxatas miajn kolorojn, vi povas elekti proprajn kolorojn - aparte por miaj pagxoj.

Tiu ekzemplo estas tre simpla. Oni povas elpensi multon plian. Kompreneble por vere povi utiligi la eblojn de propraj stilfolioj, oni devas iom lerni pri CSS, kaj versxajne ankaux pri (X)HTML. Tion vi povas fari en “Kiel fari TTT-pagxojn - Kurso pri XHTML kaj CSS”.

(Povas esti, ke mia ekzempla stilregulo ne funkcias en cxiuj TTT-legiloj, cxar mi uzis la gxeneralan jxokeran elektilon *, kiun ne komprenas cxiuj legiloj. Iuj TTT-legiloj havas nur limigitan subtenon de CSS. Eble vi devas uzi pli simplajn regulojn en via legilo.)

Deveno

La ideo aldoni TTT-signaturojn al TTT-pagxoj elpensis Eric Meyer. Mi estas unu el la unuaj, kiuj ekuzis la ideon praktike. Espereble aliaj sekvos. Eric Meyer proponis, ke TTT-signaturo estu la nomo de la TTT-servilo mem, sed kun dividostrekoj anstataux punktoj (cxar punktoj havas specialan signifon en CSS). Do “www.bertilow.com” farigxas “www-bertilow-com”. Oni povas kompreneble uzi cxian ajn vicon de signoj kiel TTT-signaturon, sed prefere oni zorgu, ke gxi estu unika.