Teknikaj klarigoj

Mia TTT-ejo estas farita por esti legebla per cxiu ajn TTT-legilo (Esplorilo, Fajrovulpo, Operao, Linko...), sed la pagxoj ne prezentigxas tute same en cxiuj legiloj. Jen kelkaj informoj pri tiu temo:

Esperantaj literoj

En miaj pagxoj la supersignaj Esperantaj literoj estas koditaj laux Unikodo. Se via TTT-legilo ne regas Unikodon, vi povas legi miajn pagxojn ankaux laux la Fundamenta H-skribo aux laux la surogata X-skribo. Por sxangxi sistemon por la Esperantaj literoj, elektu unu el ligiloj en la piedo de la pagxo.

Stilfolioj

Mi uzas stilfoliojn por proponi belan prezenton de miaj pagxoj. Legantoj, kiuj malsxaltis la uzadon de stilfolioj, kaj kompreneble ankaux uzantoj de TTT-legiloj nur-tekstaj, vocxlegaj, brajlaj, k.s., ricevas tamen tute bone legeblan simplan HTML-on kun la plena enhavo sendifekte legebla.

Miaj pagxoj estas unuavice stile arangxitaj laux la kapabloj de modernaj TTT-legiloj. En malnovaj legiloj rezultigxas simpligita prezento. Tio koncernas precipe la TTT-legilon “Esplorilo” antaux versio 8. Esplorilo 6 kaj Esplorilo 7 (kaj ankoraux pli malnovaj versioj) ricevas ecx iom tedan aspekton (intence - tiuj legiloj estas tro malnovaj - gxisdatigu!). Sed ankaux en Esplorilo 8 kaj Esplorilo 9 la rezulto estas iom simpligita pro mankantaj kapabloj de tiuj legiloj. La efektiva enhavo de la pagxoj restas (espereble) cxiam senprobleme legebla.

Mi uzas baze la stilfolian lingvon CSS2.1, sed kun pluraj aldonajxoj el de la aperonta versio CSS3, kiuj tamen jam funkcias en modernaj legiloj. Mi uzas ekzemple la econ @font-face el CSS3, kiu ebligas (en modernaj TTT-legiloj) uzi tiparojn, kiuj ne estas instalitaj en la komputilo de la uzanto, sed kiuj auxtomate elsxutigxas por uzo en la koncerna TTT-pagxo. Tial, se via legilo estas moderna, aperas cxi tie PMEG, kaj ankaux cxiuj aliaj el miaj pagxoj, kun titoloj uzantaj la specialan tiparon “Kablo”, kiu uzigxas por titoloj ankaux en la papera eldonon de PMEG.

HTML5

Ekde Majo 2011 mi uzas la marklingvon HTML5.

Notindas, ke nur modernaj legiloj ricevas pagxojn, kiuj plene uzas la novajn elementojn de HTML5. Malnovaj legiloj ricevas simpligitan version, en kiu uzigxas praktike nur elementoj, kiuj ekzistis jam en HTML4. Tiu simpligo tamen ne rimarkeblas en la efektiva aspekto de la pagxoj.

Menciindas, ke HTML5 estas tre nova, kaj ecx ankoraux iom eksperimenta. Krome gxi enhavas multajn tute novajn eblojn kaj ecojn, kiujn mi nur komencis lerni kaj esplori. Tial certe mia uzo de HTML5 ne estas perfekta.