16.5. Vortostumpoj

Iafoje, precipe en skriba lingvajxo, oni uzas kaj aux alian kunligan vorteton por ligi du aux pli da partoj de kunmetita vorto por mallongigi frazon:

• Ili en- kaj el-iris tre rapide. = Ili eniris kaj eliris tre rapide.

• Tio estas kombinita mangxajx- kaj gazet-vendejo. = ... mangxajxvendejo kaj gazetvendejo.

• Li faris multajn erarojn: skrib-, leg- kaj pens-erarojn. = ... skriberarojn, legerarojn kaj penserarojn.

• Tute mankas sub-tasoj kaj -teleroj. = ... subtasoj kaj subteleroj.

• Tio estas mangxajx- aux gazet-vendejo. = ... mangxajxvendejo aux gazetvendejo.

• Tio estas mangxajx-, sed ankaux gazet-vendejo. = ... mangxajxvendejo, sed ankaux gazetvendejo.

Cxi tiaj frazoj estas suficxe nenaturaj. Gxenerale ili estas malkonsilindaj, precipe kiam ili enhavas vortostumpojn sen finajxoj, kio normale ne estas ebla en Esperanto. Cxu ekz. mangxajx- estas unu vorto? Kiel akcenti gxin? Cxu sur la antauxlastan vokalon: mángxajx-, aux sur la lastan vokalon kontraux la reguloj pri akcento: mangxájx-? Oni prefere uzu aliajn rimedojn mallongigi, ekz. jene:

• Ili iris en la domon kaj el gxi tre rapide.

• Tio estas kombinita mangxajxa kaj gazeta vendejo.

• Li faris multajn erarojn skribajn, legajn kaj pensajn.

• Tio estas vendejo de mangxajxoj, sed ankaux de gazetoj.