PMEG 2024

15.3. Tabelvortoj je A

kia de kiu speco, havanta kiun econ
tia de tiu speco, havanta tiun econ
ia de iu speco, havanta iun econ
cxia de cxiu speco, havanta cxiun econ
nenia de neniu speco, havanta neniun econ

La tabelvortoj je A rolas A-vortece kaj priskribas la samajn specojn de vortoj kiel A-vortoj. Ili ricevas J-finajxon kaj N-finajxon laux la samaj reguloj kiel A-vortoj. Sed tabelvortoj je A montras cxiam ecojn kaj specojn, dum vortoj kun vera A-finajxo povas havi multe pli variajn signifojn.

La tabelvortoj je A estas difiniloj. Tial oni ne povas uzi la kune kun ili.

Legu pri la diferenco inter tabelvortoj je A kaj tabelvortoj je U.

Kia «

  • Kia li estas? Cxu li estas maljuna aux juna?Rz.39 Demanda kia.

  • Kia supo gxi estas? Vi simple akvon enversxis en la tason.Rz.27

  • Kian agxon vi havas?M.155

  • Kia estas via nomo?FA1.56 Aux: Kiu [el cxiuj nomoj] estas via nomo? Aux pli ofte: Kio estas via nomo? Zamenhof uzis ankaux: Kiel estas via nomo?Rz.63 Plej ofte oni tamen diras: Kiel vi nomigxas?

  • Ni sxajnigu, kvazaux ni tute ne scias, kia homo li estas.Rz.32 Kia en demanda subfrazo.

  • Sxi sentis, kian por sxi nefavoran impreson sxia ludado faris sur la virino.M.28

  • Kia gxoja festo!FE.10 Ekkria kia.

  • Kia bela persono sxi estas! kiaj okuloj! kiaj haroj! staturo de regxino!M.46

  • Kian belan sabron kaj grandan tornistron vi havas!FA1.5

  • Kia estas via laboro, tia estas via valoro.PE.851 Rilata kia.

  • Nun konfirmigxis do lia opinio, ke sxi ne estas tia, kia devas esti regxino.FA1.174

  • Tiu cxambro havis sxajnon de saloneto; sed en efektiveco gxi estis komercejo tia sama, kiaj estas cxiuj aliaj komercejoj.M.20

  • La bildo ne estis tia, kiajn oni ordinare vidas, ne, gxi havis en si vivon.FA1.191

Se post tia aux (tia) sama ne sekvas tuta frazo (kun cxefverbo), sed sola frazparto, tiam oni ne uzas kia, sed komparan kiel: Gxia uzado estas tia sama kiel en la aliaj lingvoj.FE.27 La virineto de maro vidis, ke sxi havas korpon tian kiel ili.FA1.105

Tia «

  • Dio gardu! mi estas tute moderna, kaj tia oni devas esti.FA3.50 Tia montras la antauxe diritan econ.

  • Mi ne apartenas al tiaj personoj.M.85 Tia montras ion antauxe diritan.

  • Be! li staris senhelpe, tian respondon li ne atendis.FA3.97

  • Estis tia ventego, ke la tegoloj deflugis de la tegmentoj.FA1.77 Tia almontras la postan ke-frazon.

  • Mi havas tian senton kvazaux mi kisus mian patrinon!FA2.26 Tia almontras la postan kvazaux-frazon.

  • Restu cxiam tia, kia vi estas!FA3.60 Tia almontras la postan kia-frazon.

  • La arbo de la suno estis belega arbo tia, kian ni neniam vidis.FA3.114

  • Tie estis tia izoliteco, kiun sxi neniam antauxe spertis.FA1.163 Tia almontras la postan kiu-frazon.

  • Mi gxojas, ke vi havas tian saman opinion, kiel mi.Rz.59 Tia almontras la postan kiel-komparon.

  • Ne skribu al mi tiajn longajn leterojn.FE.18 Tiajn difinas la tutan frazparton longajn leterojn. Oni povus ankaux uzi tiel, kiu priskribus nur la A-vorton longajn. La signifodiferenco estas tre malgranda.

  • Al tiuj cxi prefiksoj kaj sufiksoj estas donita la signifo de memstaraj vortoj, kaj kiel tiaj ili estas lokitaj en la vortaro.FK.233 Tiaj = memstaraj vortoj.

  • Ne, tio cxi estas jam tro ... Tia aroganteco!Rz.75 = ... Tia aroganteco estas neakceptebla! (aux simile). En tia ekkria uzo oni pli ofte uzas kia.

Iafoje kiam cxeestas rilata kia-subfrazo, tia povas esti forlasata.

Ia «

  • Via vino estas nur ia abomena acidajxo.FE.35

  • Ni ne povis atingi ian rezultaton.FE.42

  • Ili kuradas tien kaj reen, kvazaux ili havus ian laboron.FA2.153

  • En la pordega arkajxo staris ankoraux Alecxjo kaj interparolis mallauxte kun ia juna viro.M.172

  • Ib en timego elsaltis sur la teron kaj kuris ian distancon.FA3.88

  • Ne ekzistas homo, kiu ne havus iajn pekojn.Rz.8

  • Pri talento mi neniam auxdis, ke vi ian havas.M.156

Cxia «

  • Maldiligenteco estas la radiko de cxia malbono.FA3.122

  • Cxia dono estas bono.PE.351

  • Sxi meritis cxian lauxdon.FA1.82

  • En cxia okazo la artikoloj devas cxiam esti subskribitaj per plena nomo kaj adreso.OV.98

  • La plej granda parto de la publiko estas tute indiferenta por cxia nova afero.OV.85

  • La cikonio-patro alflugadis cxiutage kun bongustaj ranoj, malgrandaj serpentoj kaj cxiaj troveblaj frandajxoj por cikonioj.FA1.207

Nenia «

  • Nenia Dio ekzistas!Rt.127

  • Nenia konstruo povas esti sen bruo.PE.327

  • Pli da mono sxi ne havis, kaj laborenspezon sxi havis nenian.M.178

  • Cxu ekzistas nenia loko en la mondo, kie mi povus ion ellerni? Diru al mi, sinjoro, diru, diru![...] – mi konas nenian tian lokon.M.137

  • Nenia dancistino povos flirtadi tiel gracie kiel vi.FA1.95

  • Kun la malnova domo ili volas havi neniajn rilatojn.FA2.143

Vortfarado «