Prefiksoj de mezurunuoj «

Ekzistas internacia sistemo de prefiksoj por mezurunuoj. Gxi estas parto de la SI-sistemo, “Sistemo Internacia de Unuoj”, prizorgata de “Bureau International des Poids et Mesures” (“Internacia Buroo de Pezoj kaj Mezuroj”). Tiuj prefiksoj havas diversajn pligrandigajn kaj malpligrandigajn signifojn. Oni uzu ilin nepre nur antaux mezurunuoj kiel metro, gramo, jxulo, sekundo, litro, ampero, volto, bito k.s.

Jen la Esperantaj formoj de tiuj internaciaj prefiksoj:

Plej ofte uzataj estas: KILO, HEKTO, DECI, CENTI kaj MILI. La aliaj estas uzataj preskaux nur en faka lingvajxo. La plej novaj, RONA, KVETA, RONTO kaj KVEKTO (enkondukitaj en 2022), estas apenaux uzataj entute.

Cxi tiujn internaciajn prefiksojn oni uzu rigore laux la internaciaj principoj. Ne havas sencon krei unike Esperantajn vortojn per ili.

Plej multaj vortoj faritaj per tiuj cxi prefiksoj estas rigardeblaj kiel memstaraj radikoj en Esperanto. Pluraj el ili estas jam oficialaj, ekz.: kilogramo, decigramo, centigramo, miligramo, decilitro, centilitro, kilometro, centimetro, decimetro, milimetro. Sed en kelkaj okazoj estas tamen sendube, ke temas pri efektiva Esperanta kunmetajxo: bitoko (oko da bitoj, bajto) → kilobitoko (milo da bitokoj aux 1024 bitokoj, kilobajto).

Ekzistas ankaux du neregulaj formoj: hektaro (cento da aroj) kaj megomo (miliono da omoj). Tiuj formoj estas rigardendaj kiel apartaj radikoj en Esperanto: HEKTAR kaj MEGOM. Sed ankaux la regulaj kunmetoj hektoaro kaj megaomo estas uzeblaj.

Iam ekzistis ankaux la prefikso MIRIA (dek mil). Per gxi oni kreis interalie la vorton miriametro = “dek mil metroj”, kiu ecx farigxis oficiala Esperanta radiko, sed nek MIRIA, nek miriametro estas plu uzataj.

La simbolo µ estas greka litero, kiu nomigxas mu aux muo, sed kiam gxi estas mezurunua prefikso, oni elparolas gxin kiel mikro... La vorto mikrometro estas ankaux nomo de ia mezurilo de malgrandegaj longoj. Por la mezurunuo mikrometro ekzistas la alternativaj nomoj mikrono kaj muo.

Kiam temas pri la grando de komputila memorilo, oni ofte uzas kelkajn el tiuj cxi prefiksoj kun iom aliaj valoroj, kiuj bazigxas sur la duuma nombrosistemo uzata en komputiloj: KILO = 2¹⁰, MEGA = 2²⁰, GIGA = 2³⁰. Ekz.: kilobito = “mil bitoj” aux “1024 bitoj”, megabitoko = “miliono da bitokoj” aux “1.048.576 bitokoj”, gigabitoko = “miliardo da bitokoj” aux “1.073.741.824 bitokoj”. Por la valoroj bazitaj sur potencoj de 2, la komisiono IEC (“International Electrotechnical Commission”, “Internacia Elektrotehxnika Komisiono”) ellaboris apartajn prefiksojn, kiuj tamen ankoraux estas suficxe malofte uzataj: KIBI° = 2¹⁰, MEBI° = 2²⁰, GIBI° = 2³⁰, TEBI° = 2⁴⁰, PEBI° = 2⁵⁰, EKSBI° = 2⁶⁰, ZEBI° = 2⁷⁰, JOBI° = 2⁸⁰. Ekz.: kibibito = “1024 bitoj”, mebibitoko = “1.048.576 bitokoj”, gibibitoko = “1.073.741.824 bitokoj”.

Hxemiaj afiksoj «

Ekzistas internacia faklingva sistemo por fari sistemajn nomojn de hxemiaj kombinajxoj. Tiu sistemo enhavas multegajn radikojn kaj afiksojn, kaj specialajn regulojn por kunmeti ilin. Pri la sistemo respondecas la (ne-Esperanta) organizo IUPAC, “International Union of Pure and Applied Chemistry” (“Internacia Unio de Pura kaj Aplikata Hxemio”). Esperanto transprenu la elementojn kaj vortojn de tiu sistemo laux la skribaj, elparolaj kaj gramatikaj reguloj de Esperanto, sed sen ia ajn kroma modifo. Ne havas sencon miksi la propre Esperantan vortfaradon kun tiu internacia sistemo. Estas preferinde rigardi vortojn kreitajn per tiu sistemo kiel nekunmetitajn radikojn en Esperanto. Ili estas tamen tro multaj por esti listigitaj komplete en vortaro. Efektive ili estas senlime multaj.

Iuj el la internaciaj hxemiaj afiksoj havas la saman formon kiel oficiala aux neoficiala Esperanta afikso (ekz. AN, AT, ID, IN, IT, ON, OL kaj META), sed ne estas spaco en PMEG por pritrakti hxemian vortfaradon. Oni turnu sin al hxemiaj faklibroj, sed bedauxrinde ankoraux ne ekzistas unueca maniero esperantigi hxemiajn vortojn.